Jen kelkaj esperantlingvaj poemoj kiuj ricevis premion en diversaj konkursoj:

La 3-a loko en Belartaj Konkursoj de UEA de 2017:

​​Nebulo
 
Nebulo kaŝas la straton en diafaneco, kiel negliĝo
kiu kovras virinan korpon kun sufiĉe da neglekto:
la esenco de linioj kaj formoj ankoraŭ videblas
sed la detaloj estas lasitaj al via imagkapablo.
 
Strietoj de vintra pluvo milde tranĉas la nebulon
kiel larmoj sur la vangoj de nigre vualita vidvino.
La koloroj de la domoj kaj aŭtoj fariĝis fumecaj
kiel gamboj en bruna nilono kaŝanta makulojn.
Mi kviete promenas kun ŝi, brakon en brako,
kiel poemo en poemo.

Selektita, sed ne premiita en konkurso "Poezio el Ĉiuj Ĉieloj":

Kunlaboro
 
Vi nun legas kion mi verkis;
la vortoj eniras vian kapon.
 
Tio kion mi imagis, vi nun mem imagas.
Ekzemple, mi kuŝis sur la plaĝo
kaj jam vi kvazaŭ sentas la sablon.
 
Mi diras ke mi kuŝis tie apud ŝi
kaj jam vi vidas ŝian bikinon,
- mi rapide skribas monokinon,
simple ĉar eblas.
 
Poste ni iras al nia ĉambro
kaj ankaŭ vi jam imagas vin en la hotelo.
Ni senvestiĝas, forlavas la sablon en la duŝo
dum vi restas tie kiel gvatanto.
 
Senhonte vi observas nin, vidas kiel ni kisas,
ĝis kiam mi afable sed firme forpelas vin
kaj ni daŭrigas, malantaŭ tiu ĉi fermita poemo.

Instiga premio en konkurso EKRA-2017:

Lukto

Vortoj verŝiĝas daŭre
en miajn okulojn kaj orelojn

alvenas ĉe la vortoj
kiuj jam nestas en la cerbo,

ili absorbiĝas aŭ kolizias,
estingiĝas, puŝas, knedas,

promesas, dronas, nutras,
murdas aŭ mutiĝas,

vortoj en tekstoj kaj konversacioj,
vortoj kiuj luktas same kiel mi,

en mondo de lingvo
por pluvivi kaj havi signifon.